غرف الاطفال ، تنظيمها و تنسيقها

السلام عليكم و رحمة الله ..

غرفة الاطفال .. هي جنتهم .. عالمهم الخاص ..

لازم مانهملها ولازم ما نبالغ في ديكوراتها ..

لازم تكون مكان

مريحة قبل ماتكون انيقة ..

منظمة قبل ما تكون روعه ..

آمنة قبل ما تكون جميلة ..

لان الاطفال صدقوني يحسون بطاقة المكان ..

والطفل مايبغا سرير غالي ولا ديكورات متعوب عليها ولا ارضيه بالمبلغ الفلاني ..

الطفل اهم شي عنده : مرتبه ، نظيفه ، شرحة ، آمنه( بدون مايستوعب انه هالاشياء مهمه )

لانه اذا كانت ماوفت هالاشياء الثلاثه اقولك من الحين طفلك ماراح يحب يجلس فيها او يقضي فيها وقت ..

راح تلاقيه طول الوقت عندك جالس ، يحوس حولينك ، يجيب العابه عندك ..

( حتى لو كانو طفلين نفس الوضع يجيبون العابهم عندك ولا تقدرين تقنعينهم يلعبون في غرفتهم لانهم مايحبونها )

لكن اذا وفرتي الغرفه الي تعجبه هو مو انتي ..

راح تكون بالنسبه له زي الملاذ ..

دايما انصح الامهات الي يستائلون كيف انسق غرفة طفلي ؟ ايش اضربها لون ؟

اقولها اسأليه ..!! ليش تخلين القرار لك ..

الطفل من عمره ٣ سنوات وفوق وهو يميز الالوان .. يبدا يكون عنده هوايات ..

يحب الحيوانات ، تحب الورود ، يحب الطيارات ، تحب الاميرات ، يحب باتمان ، تحب الاسماك

يحب اللون الاخضر ، تحب اللون الاصفر  ..

والام الذكيه الي تعرف هالشي في طفلها ..

وحتى لو ماعرفتيه اسأليه .. وريه صور اشياء وقولي له ايش تحب ؟

( مع اني متأكده ان كل ام تعرف .. )

طيب خلونا نتكلم عن الالوان ..

اسألي طفلك ايش يحب واضربي لون الجدران باللون اللي يحبه ..

اختاري افتح الالوان لا تختاري الوان غامقه او صارخه ( خصوصا اذا الاضاءة الطبيعيه ضعيفه )

وخلي الاكسسوارات متنوعه بين الوان مشكله واللون الرئيسي الاغلب للون اللي يحبه ..

السؤال الاكثر انتشارا .. ايش في الوان مناسبه للبنات غير الوردي ؟

كل الالوان مناسبه مافي لون مايناسب ..لكن بشرط تختاري بدرجة  باستيليه فاتحة ..

وراح يطلع جميل جدا ..

ايش الوان مناسبه للاولاد غير الازرق ؟

كل الالوان باختصار الوردي ..

( جايز تخلي لون الجدار ابيض او بيج او رمادي فاتح جدا ، مو لازم تضربيها لون حتى تصير غرفة جميلة

واقول هالكلام للناس الي ماتقدر تضرب دهان جديد لاسباب عدة ، لا تتحسفي الجدار مو مهم ابدا  ، في

اشياء اهم زي الستاره و السجاد و الاكسسورات ومفرش السرير ، هذه كلها تلعب دور في جمال الغرفه ولون

الجدار صحيح يعطي جو ، لكن عدمه مايقلل من جمال الغرفه المرتبه المتناسقه ابدا ، و أزيدك من الشعر البيت

الجدار الابيض جميل اذا بيكون خلفيه لرسومات او طبعات :

( بالنسبه ليا الجدران البيضا ، البيج ، انسب شي لغرف الاطفال تظهر كل شي بلون جميل )

الرسم على الجدران :

جميل وغير مكلف لو بترسمي بنفسك او تجيبي احد تعرفينه يرسم .. 

فكره حلوه اذا ماتقدر تضربي دهان او تحطي ورق جدران .. 

الارضيات :

الموكيت لغرف النوم او الباركيه او الفينيل .

( اذا كانت الغرفه سيراميك ومافي امكانيه تغيروها ، يفضل وضع سجاده كبيره )

غرفة الالعاب : باركيه ، فينيل ، مربعات فلينيه .

( وجود السجاده ضروري خصوصا اذا كان الطفل يحب يلعب عالارض ( ومين مايلعب على الارض من الاطفال

اذا كانت الغرفة واحدة وفيها ركن للالعاب فلازم وجود سجاده عند الركن .

الاثاث

قطع الاثاث تعتمد على مساحة الغرفه ..

طبعا كل ما كبرت المساحة كل ماصار مسموح لك تكثري قطع ..

كرسي او كنبه ، او تسريحة او دواليب متعدده ..

واذا صغرت المساحة صارت خياراتك محدوده

الغرفه الصغيره .. ممكن تقهرك شوي .. لكن صدقيني تقدرين تطلعينها بشكل جميل ..

( احيانا تكون الغرفه حجمها كويس لكن عدد الاطفال يقلل المساحة )

بالنسبه للسرير المناسب للاطفال ، افضل شي الطفل يكون في سرير بيبي 

و يكون كبير يشيله الين سنتين .. 

و بعدها ينتقل الطفل فورا الى سرير مناسب له الين عمر ١٠ او ١٢ سنه .. 

ويفضل يكون بحاجز لان الطفل صغير اول ما ينتقل له .. 

ليش فورا الى سرير كبير .. لانه مايفرق بينهم .. 

وحتى يعتمد على نفسه في الطلعه والنزله ( اختيار سرير مناسب في الطول ) 

لضيق المكان الرفوف افضل من الكوميدنو ..

اختيار الرفوف مايعني انهم مالقو كوميدنو .. لكن الكومدينو راح تاخذ مكان اكبر ..

ولاحظو الرفوف بيضا ( نفس لون الجدار ) حتى ماتبان وتصير زي التمويه ..

حتى مناسبه تكون بين سريرين ..

الغرفه صغيره جدا لكن مامنهم يحطون تسريحة ومكتب كمان ..

لكن لاحظو كلهم بحجم صغير وهذا الشي مهم جدا في الغرف الضيقه ..

المكتب عرضه جدا صغير ومناسب للمكان .. ويعتبر كمان كومدينو .. استغلال جيد ..

والرف العلوي فكره جيده كما

افكار التنظيم والتخزين : 

الرفوف : 

هذه اهم الاشياء الي تواجدها ضروري حتى يصير المكان مرتب مصنف منظم .. 

سواء في غرفه العاب او في ركن في غرفة طفلك او صاله او اي غرفه خارجيه 

افكار اخرى : 

فكره السلال المعلقه .. 

استغلال خلف الباب : 

سواء باب الغرفه او باب دولاب الملابس .. 

افكار منوعه حبيتها تأملوها : 

كانت رولات مناديل .. فكره بطله 

لطيفه .. 

واختيار الستاره بشكل ملفت اختيار بطل .. 

لان الارضيه ناعمه والسرير ساده .. 

فكان اختيار الستاره بشكل جذاب ضروري حتى يعطي الغرفه منظر جميل .

شايفين الطائرات الورقيه المعلقه .. دايما اضافه شي نازل من الجدار منعش لغرف الاطفال 

غرفه انيقه .. ترتيبها جميل .. 

حبيت حركة الجدار نعومه للبنات .. 

الخريطه لها جاذبيه عالجدار .. واختيار جميل لغرف الاولاد .. 

ولاحظو تنسيق درجات الموف بينها وبين مفرش السرير .. 

والعلب الخضرا .. 

فن 

وهذا موقع لشراء غرف الأطفال

هنا

بكذا اكون خلصت ان شالله يارب استفدتو 

لو بالقليل .. 

في أمان الله احبتي ..